Babad Bandayuda Ngaosi Labuh Labet Pejuang
Jumat, 25 October 2013 | 20:26 WIB
Ngayogyakarta, www.jogjatv.tv – Jaman moderen samangke, racak warga masyarakat kirang mangertos teges lelampahan perjuwanganipun
para pahlawan. Nanging beda kaliyan Komunitas Babad Bandayuda ingkang
ngaosi labuh labetipun pahlawan kanthi caranipun. Komunitas Babad
Bandayuda mujudaken salah satunggaling pasarta pameran Fair Vredeburg
“Museum Dan Komunitas”, mapan ing Beteng Vredeburg Ngayogyakarta.Babad Bandayuda, satunggaling komunitas ingkang ngusung re enactor utawi ngambali malih lelampahan perjuwangan, mliginipun Perjuwangan Kamardikan Indonesia, kanthi damel tironipun piranti perjuangan, ing antawisipun sragam, sanjata, lan piranti sanesipun, sarta paraga wigatos perjuwangan kamardikan. Maneka piranti lan paraga ingkang ngangge busana pejuwang ugi tumut dipun pameraken salebeting pameran Fair Vredeburg, wiwit tanggal 23 ngantos 27 Oktober ing Benteng Vredeburg.
Roni, Wakil Ketua Komunitas Babad Bandayuda ugi mratelakaken, Komunitas Babad Bandayuda ingkang madeg rikala taun 2012 punika, sampun asring tumut karnaval lan pameran kados samangke, kepara ugi tumut nyengkuyung shooting film Soekarno garapanipun Hanung Bramantyo, minangka paraga prajurit Pembela Tanah Air Indonesia. Kaajab kanthi wontenipun komunitas punika, saged napak tilas malih lampah perjuwangan bangsa indonesia nalika ngrebat kamardikan, nuwuhaken jiwa nasionalisme lan patriotisme, sarta supados ciri mathi Kitha Ngayogyakarta minangka kitha budaya lan sejarah tetep monjo. (Tim Liputan)
http://www.jogjatv.tv/berita/25/10/2013/babad-bandayuda-ngaosi-labuh-labet-pejuang
Tidak ada komentar:
Posting Komentar